മുരിങ്ങ ഉൽപ്പന്നങ്ങൾക്ക് ഓസ്‌ട്രേലിയ വിലക്കേർപ്പെടുത്തി; ഇന്ത്യൻ കയറ്റുമതി മേഖലയ്ക്ക് തിരിച്ചടി

കാൻബറ: ലോകമെമ്പാടും സൂപ്പർ ഫുഡ് (Super Food) ആയി കണക്കാക്കപ്പെടുന്ന മുരിങ്ങയിലയ്ക്കും അതിന്റെ അനുബന്ധ ഉൽപ്പന്നങ്ങൾക്കും ഓസ്‌ട്രേലിയയിലും ന്യൂസിലാൻഡിലും കർശന നിരോധനം. ഭക്ഷ്യസുരക്ഷാ മാനദണ്ഡങ്ങൾ കൈകാര്യം ചെയ്യുന്ന ‘ഫുഡ് സ്റ്റാൻഡേർഡ്‌സ് ഓസ്‌ട്രേലിയ ന്യൂസിലാൻഡ്’ (FSANZ) പുറപ്പെടുവിച്ച പുതിയ ഉത്തരവ് പ്രകാരം മുരിങ്ങയില, മുരിങ്ങക്കായ, മുരിങ്ങ വിത്തിൽ നിന്നുള്ള എണ്ണ എന്നിവ വാണിജ്യപരമായി വിൽക്കുന്നതും ഭക്ഷണ പദാർത്ഥങ്ങളിൽ ഒരു ചേരുവയായി ഉപയോഗിക്കുന്നതും പൂർണ്ണമായി നിരോധിച്ചു.

പ്രവാസികൾ ഉൾപ്പെടെയുള്ള വലിയൊരു വിഭാഗം ജനങ്ങളെയും ഇന്ത്യയിൽ നിന്നുള്ള കാർഷിക കയറ്റുമതി മേഖലയെയും നേരിട്ട് ബാധിക്കുന്നതാണ് ഈ അപ്രതീക്ഷിത തീരുമാനം.

എന്തുകൊണ്ടാണ് ഈ നിരോധനം?

യഥാർത്ഥത്തിൽ മുരിങ്ങയ്ക്ക് എന്തെങ്കിലും വിഷാംശമുള്ളത് കൊണ്ടല്ല ഓസ്‌ട്രേലിയ ഈ നടപടി സ്വീകരിച്ചിരിക്കുന്നത്. ഓസ്‌ട്രേലിയൻ നിയമപ്രകാരം പാരമ്പര്യമായി അവിടെ ഉപയോഗിച്ചുവരാത്ത സസ്യങ്ങളെയും ഉൽപ്പന്നങ്ങളെയും ‘നോവൽ ഫുഡ്’ (Novel Food) അഥവാ അപൂർവ്വമായ/പുതിയ ഭക്ഷണ പദാർത്ഥങ്ങളുടെ പട്ടികയിലാണ് ഉൾപ്പെടുത്താറുള്ളത്.

മുരിങ്ങ മനുഷ്യ ഉപയോഗത്തിന് പൂർണ്ണമായും സുരക്ഷിതമാണെന്ന് തെളിയിക്കുന്ന കൃത്യമായ ശാസ്ത്രീയ പഠനങ്ങളോ സുരക്ഷാ ഡാറ്റയോ (Safety Data) അപേക്ഷകർക്ക് അധികൃതർക്ക് മുന്നിൽ സമർപ്പിക്കാൻ സാധിച്ചില്ല. ജനങ്ങളുടെ ആരോഗ്യ സുരക്ഷ മുൻനിർത്തി, കൃത്യമായ തെളിവുകളുടെ അഭാവത്തിലാണ് FSANZ ഈ അപേക്ഷ നിരസിച്ചതും വിപണന വിലക്ക് ഏർപ്പെടുത്തിയതും.

നിരോധനം ബാധിക്കുന്ന കാര്യങ്ങൾ

• വാണിജ്യ വിപണനം: വിപണിയിൽ ലഭ്യമായിരുന്ന മുരിങ്ങയില പൊടി (Moringa Powder), ഗുളികകൾ, മുരിങ്ങ ചായ (Moringa Tea) എന്നിവ ഭക്ഷ്യവിഭാഗത്തിൽ വിൽക്കാൻ പാടില്ല.
• ഇറക്കുമതി വിലക്ക്: വിദേശരാജ്യങ്ങളിൽ നിന്ന് മുരിങ്ങയോ അതിന്റെ ഉൽപ്പന്നങ്ങളോ ഓസ്‌ട്രേലിയയിലേക്ക് ഇറക്കുമതി ചെയ്യുന്നത് ‘ഇംപോർട്ടഡ് ഫുഡ് കൺട്രോൾ ആക്ട്’ പ്രകാരം കടുത്ത കുറ്റകൃത്യമാണ്. മാനദണ്ഡങ്ങൾ പാലിക്കാതെ കൊണ്ടുവരുന്ന ഉൽപ്പന്നങ്ങൾ പിടിച്ചെടുത്ത് നശിപ്പിക്കുകയോ തിരിച്ചയക്കുകയോ ചെയ്യും.

മുരിങ്ങ നട്ടാൽ കേസാകുമോ? പ്രവാസികൾ അറിയേണ്ടത്

രാജ്യത്ത് നിരോധനം വന്നതോടെ ഓസ്‌ട്രേലിയയിലുള്ള മലയാളി പ്രവാസികൾക്കിടയിൽ വലിയ ആശങ്ക ഉയർന്നിരുന്നു. എന്നാൽ വ്യക്തിപരമായ ആവശ്യങ്ങൾക്ക് ഇതിന് തടസ്സമില്ലെന്ന് അധികൃതർ വ്യക്തമാക്കുന്നു:

വ്യക്തിഗത ഉപയോഗത്തിന് വിലക്കില്ല: മുരിങ്ങയുടെ വാണിജ്യപരമായ കൃഷിക്കും വിപണനത്തിനും മാത്രമാണ് നിരോധനമുള്ളത്. വ്യക്തിപരമായ ആവശ്യങ്ങൾക്കായി സ്വന്തം വീട്ടുപറമ്പിൽ മുരിങ്ങ മരം നട്ടുവളർത്തുന്നതിനോ, അതിന്റെ ഇലകൾ സ്വകാര്യമായി പാകം ചെയ്ത് കഴിക്കുന്നതിനോ യാതൊരുവിധ നിയമതടസ്സവുമില്ല.

പുതിയ ശാസ്ത്രീയ കണ്ടെത്തൽ

ഭക്ഷ്യസുരക്ഷയുടെ പേരിൽ ഓസ്‌ട്രേലിയയിൽ മുരിങ്ങയ്ക്ക് വിലക്കുണ്ടെങ്കിലും, ശാസ്ത്രലോകം ഈ അദ്ഭുത സസ്യത്തിന്റെ മറ്റൊരു വലിയ ഗുണം കൂടി അടുത്തിടെ കണ്ടെത്തുകയുണ്ടായി. പ്രശസ്ത ശാസ്ത്ര ജേണലായ ‘എസിഎസ് ഒമേഗ’യിൽ (ACS Omega) പ്രസിദ്ധീകരിച്ച പഠന റിപ്പോർട്ട് അനുസരിച്ച്, ആധുനിക ലോകം നേരിടുന്ന വലിയൊരു വെല്ലുവിളിയായ മൈക്രോപ്ലാസ്റ്റിക് മലിനീകരണത്തെ ചെറുക്കാൻ മുരിങ്ങ വിത്തുകൾക്ക് സാധിക്കും. വെള്ളത്തിലെ മൈക്രോപ്ലാസ്റ്റിക്കുകളെ അരിച്ചെടുത്ത് മാറ്റാൻ മുരിങ്ങ വിത്തുകളിലെ ചില ഘടകങ്ങൾക്ക് പ്രത്യേക ശേഷിയുണ്ടെന്നാണ് കണ്ടെത്തൽ.

പരമ്പരാഗതമായി നമ്മൾ ഏറെ ഗുണപ്രദമെന്ന് കരുതുന്ന പല ഭക്ഷണപദാർഥങ്ങളും വിദേശ രാജ്യങ്ങളിലെ കർശനമായ പരിശോധനകളിൽ പരാജയപ്പെടാറുണ്ട്. എന്നാൽ അത് ആ ഭക്ഷണത്തിന്റെ ദോഷം കൊണ്ടല്ല, മറിച്ച് കൃത്യമായ ശാസ്ത്രീയ തെളിവുകളുടെയും ഡേറ്റയുടെയും അഭാവം മൂലമാണെന്ന് ഈ സംഭവത്തിലൂടെ മനസ്സിലാക്കാം.