ബികോമും ടാലിയും വശമുണ്ടോ? കേരള സര്‍ക്കാര്‍ ശമ്പളം വാങ്ങിക്കാം, അതും പിഎസ്‌സി എഴുതാതെ!

സംസ്ഥാന സര്‍ക്കാരിന് കീഴിലുള്ള ക്ലീന്‍ കേരള കമ്പനി ലിമിറ്റഡ് അക്കൗണ്ട്‌സ് അസിസ്റ്റന്റ് തസ്തികകളിലേക്ക് അപേക്ഷ ക്ഷണിച്ചു. കണ്ണൂര്‍, വയനാട് ജില്ലകളിലെ വിവിധ ഒഴിവുകളിലേക്ക് 2026 ജനുവരി 7-ന് നടക്കുന്ന വാക്ക്-ഇന്‍ ഇന്റര്‍വ്യൂവിലൂടെയാണ് നിയമനം. നിയമനം താല്‍ക്കാലികമായിരിക്കും. തിരഞ്ഞെടുക്കപ്പെടുന്നവര്‍ക്ക് പ്രതിദിനം 800 രൂപ ശമ്പളമായി ലഭിക്കും.

വാക്ക്-ഇന്‍ ഇന്റര്‍വ്യൂവിലൂടെ മാത്രമാണ് ഉദ്യോഗാര്‍ത്ഥികളെ തിരഞ്ഞെടുക്കുന്നത്. നിലവില്‍, ഒഴിവുകളുടെ എണ്ണം വ്യക്തമാക്കിയിട്ടില്ല. അപേക്ഷകര്‍ക്ക് 2026 ജനുവരി 1-ന് 35 വയസില്‍ താഴെ പ്രായമുണ്ടായിരിക്കണം. ബികോം ബിരുദവും ടാലി സോഫ്റ്റ്വെയറില്‍ പ്രാവീണ്യവുമാണ് അടിസ്ഥാന യോഗ്യത. ഏതെങ്കിലും സ്ഥാപനത്തില്‍ യോഗ്യത നേടിയ ശേഷം കുറഞ്ഞത് രണ്ട് വര്‍ഷത്തെ പ്രവൃത്തിപരിചയം നിര്‍ബന്ധമാണ്.

ഈ നിയമന പ്രക്രിയയില്‍ അപേക്ഷാ ഫീസ് ആവശ്യമില്ല. ഉദ്യോഗാര്‍ത്ഥികളെ രേഖാ പരിശോധനയുടെയും വ്യക്തിഗത അഭിമുഖത്തിന്റെയും അടിസ്ഥാനത്തിലാണ് തിരഞ്ഞെടുക്കുന്നത്. അതിനാല്‍ ഉദ്യോഗാര്‍ത്ഥികള്‍ക്ക് വേഗത്തില്‍ നിയമന നടപടികളുടെ ഭാഗമാകാന്‍ കഴിയും. താല്‍പ്പര്യമുള്ള ഉദ്യോഗാര്‍ത്ഥികള്‍ നിര്‍ദ്ദിഷ്ട ഫോര്‍മാറ്റിലുള്ള അപേക്ഷാ ഫോം പൂരിപ്പിച്ച്, ആവശ്യമായ എല്ലാ യോഗ്യതാ രേഖകളുടെയും സ്വയം സാക്ഷ്യപ്പെടുത്തിയ പകര്‍പ്പുകളും അസല്‍ രേഖകളും സഹിതം അഭിമുഖത്തിന് എത്തണം.

വിദ്യാഭ്യാസ യോഗ്യത, പ്രായം, പ്രവര്‍ത്തിപരിചയം, തിരിച്ചറിയല്‍ എന്നിവ തെളിയിക്കുന്ന രേഖകള്‍ കൈവശം കരുതുക. ജനുവരി 7-ന് രാവിലെ 10 മണിക്ക് തിരുവനന്തപുരത്തുള്ള ക്ലീന്‍ കേരള കമ്പനി ലിമിറ്റഡിന്റെ ഓഫീസിലായിരിക്കും അഭിമുഖം. വഴുതക്കാടുള്ള സ്റ്റേറ്റ് മുനിസിപ്പല്‍ ഹൗസിന്റെ രണ്ടാം നിലയിലാണ് ഈ ഓഫീസ് (ചിന്മയ സ്‌കൂളിന് എതിര്‍വശം). കൂടുതല്‍ വിവരങ്ങള്‍ക്കായി 0471 2724600 എന്ന നമ്പറില്‍ ബന്ധപ്പെടാം.

അപേക്ഷകര്‍ ഔദ്യോഗിക വെബ്‌സൈറ്റായ www.cleankeralacompany.com സന്ദര്‍ശിച്ച്, ‘റിക്രൂട്ട്മെന്റ്/കരിയര്‍/പരസ്യം’ എന്ന മെനുവില്‍ അക്കൗണ്ട്‌സ് അസിസ്റ്റന്റ് ഒഴിവിലേക്കുള്ള തൊഴില്‍ വിജ്ഞാപനം കണ്ടെത്തുക. വിജ്ഞാപനം ഡൗണ്‍ലോഡ് ചെയ്ത് ശ്രദ്ധാപൂര്‍വ്വം വായിച്ച് യോഗ്യതാ മാനദണ്ഡങ്ങള്‍ ഉറപ്പുവരുത്തേണ്ടത് അത്യാവശ്യമാണ്. തുടര്‍ന്ന്, ഔദ്യോഗിക അപേക്ഷാ ഫോം പ്രിന്റ് എടുത്ത് ആവശ്യപ്പെട്ട വിവരങ്ങള്‍ കൃത്യമായി പൂരിപ്പിക്കുക.

ആവശ്യമായ രേഖകളുടെ സ്വയം സാക്ഷ്യപ്പെടുത്തിയ പകര്‍പ്പുകള്‍ അപേക്ഷയോടൊപ്പം അറ്റാച്ചുചെയ്യുക. അപേക്ഷാ ഫീസ് ഇല്ലാത്തതിനാല്‍ ഈ ഘട്ടങ്ങള്‍ പൂര്‍ത്തിയാക്കിയാല്‍ നേരിട്ട് അഭിമുഖത്തിന് പോകാവുന്നതാണ്. പൂരിപ്പിച്ച അപേക്ഷാ ഫോമിന്റെയും അനുബന്ധ രേഖകളുടെയും ഒരു പകര്‍പ്പ് സൂക്ഷിച്ച ശേഷം ജനുവരി 7-ന് വാക്ക്-ഇന്‍ ഇന്റര്‍വ്യൂവിനായി വേദിയില്‍ ഹാജരാകാവുന്നതാണ്.